ला पाज । बोलिभियामा एक सैन्य परिसरभित्र भएको शक्तिशाली विस्फोटमा कम्तीमा १० जनाको मृत्यु भएको छ भने ६० भन्दा बढी घाइते भएका छन्। स्थानीय स्वास्थ्य निर्देशक रीटा नेब्रास्काका अनुसार मृतकको संख्या १५ सम्म पुग्न सक्ने आशंका गरिएको छ।
राजधानी ला पाजबाट करिब ३० किलोमिटर टाढा रहेको वियाचा क्षेत्रको सैन्य परिसरमा स्थानीय समयअनुसार शुक्रबार दिउँसो करिब २ः३० बजे विस्फोट भएको हो।
अधिकारीहरूका अनुसार विस्फोट सैन्य परिसरको त्यस्तो क्षेत्रमा भएको थियो, जहाँ आतिशबाजी तथा पाइरोटेक्निक सामग्री भण्डारण गरिएको थियो। रक्षा मन्त्रालयको भण्डारमा राखिएका यस्ता सामग्रीबाट विस्फोट सुरु भएको भए पनि यसको वास्तविक कारण अझै स्पष्ट भइसकेको छैन।
स्वास्थ्य निर्देशक नेब्रास्काका अनुसार घटनामा ६२ जना घाइते भएको प्रारम्भिक विवरण आएको छ। घाइतेमध्ये १४ जनालाई थप उपचारका लागि राजधानी ला पाजका अस्पतालमा लगिएको छ। घाइतेमध्ये एक बालिका पनि रहेकी छन्, जसलाई शरीरको ठूलो भागमा तेस्रो तहको जलन भएको बताइएको छ।
प्रहरीका अनुसार विस्फोटबाट ५० भन्दा बढी मानिस घाइते भएका छन्। विस्फोटको तीव्रताका कारण सैन्य परिसर आसपासका दर्जनौँ घरमा समेत क्षति पुगेको छ भने धेरै घरका झ्यालका सिसा फुटेका छन्।
विस्फोटपछि आपत्कालीन सेवा, एम्बुलेन्स, स्वास्थ्यकर्मी र प्रहरी टोली घटनास्थलमा परिचालन गरिएको छ। घाइतेलाई उपचारका लागि स्वास्थ्य संस्थामा पुर्याउने तथा प्रभावित क्षेत्रमा उद्धार र राहतको काम भइरहेको अधिकारीहरूले बताएका छन्।
यसैबीच, घटनास्थलमा पुनः विस्फोट हुन सक्ने जोखिम अझै कायम रहेको अधिकारीहरूले चेतावनी दिएका छन्। अग्निनियन्त्रकहरूले परिसरभित्र तापक्रम उच्च रहेको एउटा स्रोत फेला पारेपछि स्थानीय बासिन्दालाई घटनास्थलबाट कम्तीमा १५० मिटर टाढा रहन आग्रह गरिएको छ।
अधिकारीहरूले अहिले प्राथमिकता घटनास्थललाई सुरक्षित बनाउने, थप विस्फोटको जोखिम नियन्त्रण गर्ने र घाइतेको उपचार सुनिश्चित गर्ने रहेको बताएका छन्। विस्फोटको कारणबारे विस्तृत अनुसन्धान भने सुरु गरिएको छ।
